Wednesday, August 29, 2007

عصام العريان و اخوانه.. عذرا تاخرت فى الكتابة عنكم


عصام العريان واخوانه

من فترة عاوز ادون ومش عارف.. كان نفسى اكتب عن عصام العريان يوم القبض عليه وما قدرتش
قد ايه بحب الرجل ده بس عمرى ما اتفقت مع جماعته
بحبه اكتر من عبد المنعم ابو الفتوح
عمرى ما خفت من عصام العريان بحس انه راجل واضح وعشان كده بحبه
بحب عبد المنعم ابو الفتوح كمان بس دا بقى باخاف منه
عبد المنعم ابو الفتوح بيعرف يلعب بالكلام وبيعرف يقول الكلمة بميت نغمه وصوت لكن برضه بحبه وباحترمه لكنى باحب عصام العريان اكتر
تعرفوا يوم ما اتقبض عليه كنت هاكلمه عشان اساله ليه منعوه من السفر وبعدين خليت حد تانى يكلمه وبعد ما اتقبض عليه زعلت قوى بس رجعت حمدت ربنا لانى كنت هاشيل ذنبه جوايا
ما هو مش كل ما اكلمه يتقبض عليه
كل ما حد من الاخوان يتقبض عليه بابقى عاوز اكتب اتضامن معاه
بس الواحد ساعتها يمكن يعوز يفتح مدونة تضامن مخصوص ليهم
ويخصص من وقته قيمة 24 ساعة فى اليوم تضامن
كنت عاوز اكتب عن خيرت الشاطر رغم ان اختلافى معاه يمكن يوصل لحد الرعب من افكاره
لكنى ما باخافش من عصام العريان
كنت بجد عاوز اكتب كتير عن حسن مالك
وعن كمان كل بسطا الاخوان المعتقلين اللى محدش بيسمع اسمهم
يوم ما خديجة مالك كانت فى نقابة الصحفيين اتمنيت لو كان ليا بنت تبقى فى قوتها
يومها رحت سلمت عليها واتمنيت ان ربنا يجمع شملها بابوها وكنت عاوز اقولها ان بجد حسن مالك عرف يربى لكنى مقدرتش غير انى اتمنى رجوعه لهم
عموما انا برضه باحب عصام العريان اكتر
ورغم انى عبد المنعم ابو الفتوح بيحاول يكون الوجه الاكثر انفتاحا من الاخوان لكنى بحب عصام العريان اكتر
بحس ان التضامن معاه مش واجب ولا بس قولة حق عند سلطان جائر
لا اكتر من كده
مش تعبير عن رفض لظلم انسان
ولا اعتراض واجب انما فرض عين عليا
حاسس انى باقول كلام ملخبط بس كمان
حاسس انى اتاخرت كتييير عن كتابة البوست ده .. المرة دى مش علشان خاطر عصام العريان لوحده لا كمان علشان خاطر كل الاخوان المعتقلين رغم ان اختلافى معهم يمكن يوصل لحد الخوف على البلد لو وصلوا للحكم
خوف على مستقبل ابنى بس دا ما يمنعش ان حقهم يكونوا موجودين وحقهم يوصلوا لو الناس اختارتهم
وحقى اخاف منهم بس احب عصام العريان
واحترم شجاعة وقوة خديجة مالك
ما اعرفش ابوها بس عرفته منها
وكمان اطالب بحقهم جميعا فى الحرية
الحرية للعريان ..الحرية للاخوان .. الشاطر ومالك
وكل المعتقلين اللى الفقر نسانا اساميهم

4 comments:

yas said...

ازيك يا استاذ خالد
انا للأسف مكنتش اعرفك قبل كده
وعرفتك اما سألت واحد صديق نفسك تكون ايه
قالى نفسي ابقي زى استاذ خالد البلشي
فالحقيقة يعنى انا مكنتش اعرف حضرتك
عارف طبعا كمية الجهل اللى الشباب فيه دلوقتى
فعرفنى على مدونتك
بالنسبة للبوست الواحد بيضايق جدا اما يلاقي ناس محترمة ومتعلمة ومثقفه كده بيتبهدلوا حرام عليهم بجد

مدونه يلا نفضحهم said...

يلا نفضحهم
مدونه تمثل بدايه عمل جرىء و قوى
عن طريق لجنه بدأها و يرئسها الأستاذ / "محمد عبد القدوس" بالقاهره
والدكتور / " إبراهيم الزعفرانى" بالاسكندريه
هدفها فضح جرائم هذا النظام
من تعذيب و هتك أعراض و تزوير
شارك معنا بمدونتك
عن طريق وضع رابط لنا على الاقل
لوضع الرابط برجاء الدخول على المدونه و نقل الكود الموجود بداخلها
Yallanefdahom.blogspot.com
نحن نسعى لتجميع اكبر عدد للمدونين لعمل شبكه ضخمه من المدونين تجعل كل من تسول له نفسه أن يعذب او يزور او يرتشى أو أو أو
أن يفكر الف مره قبل الأقدام على ذلك
ابعث لنا بأى وثائق أو فيديو او صوره
تثبت اى جريمه ارتكبت فى حق اى مواطن
على بريد المدونه
efdah@yahoo.com
إفضحوهم

khadigamalek said...

سلام عليكم و رحمة الله وبركاته
جزاك الله خيرا يا أستاذ خالد
فعلا تأثرت جدا بالبوست ده
وعايزيه أقولك أن القوة ديه أستمدتها من الظلم الى أحنا بنمر بيه والقهر اللى بنشوفه فى كل طلعة شمس بتمر علينا واحنا فى القضية ديه
ربنا يثبتا ويهون علينا رمضا و يرجع المعتقلين بالسلامة
خديجة مالك
khadiga.malek@gmail.com ا

برنامج الاوفيس 2007 said...

الحرية للعريان ..الحرية للاخوان

 
eXTReMe Tracker