Wednesday, May 30, 2007

دعوة لتبنى حملة للافراج عن جميع المعتقلين


الافراج عن عبد المنعم محمود وشباب الاخوان

.. عقبال ايمن نور وبقية المعتقلين


وصلنى الأن ان المحامى العام لنيابات القاهرة اصدر قرارا بألا وجه لإقامة الدعوى فى قضية عبد المنعم محمود وطلاب المعهد الفنى وهو مايعنى الإفراج عنهم فورا وتبقى الخطوات الأخيرة وكل املنا الا يتدخل امن الدولة لتعطيل اجراءات الإفراج
قرار المحامى العام يكشف بشكل لافت أهمية الضغوط التى مورست لاطلاق سراح منعم
ويؤكد على أهمية مثل هذه التحركات ومن هنا فليكن الافراج عن عبد المنعم محمود بداية لتبنى دعوة للافراج عن جميع المعتقلين فى السجون من جميع الاتجاهات وان تشمل هذه الدعوة جميع المدونات ويتم دعوة الصحف والمنظمات الأهلية ومنظمات حقوق الانسان لتبنيها ويمكن تجديد حملة الخمسين يوما للافراج عن جميع المعتقلين والتى سبق ان اطلقها عدد من النشطاء فى 2006 منهم د. هبة رؤوف والعبد لله وعدد من النشطاء من جميع الاتجاهات
مبروك لمنع ولطلاب المعهد وعقبال ايمن نور جميع المعتقلين وعقبال الافراج عن مصر من حكم ابو جمال وزبانيته

Tuesday, May 29, 2007

عبير الغريبة مش خايفة فى كندا


عبير تدون من كندا وتنعى ايميلها المسروق

تعلن عبير العسكرى من مقرها فى الأراضى الكندية (المقدسة )عن افتتاحها لمدونتها امس الأثنين 28 مايو والذى
واكب صدور مدونة عم الحاج احمد فؤاد نجم (الفاجومى ) وتهيب عبير بكل المهتمين بشئون المدونات ان يلتفتوا الى مدونتها الفيحاء باعتبارها سبق فى عالم التدوين وهى اذ تزف لكم نبأ افتتاح مدونتها السار- رضيتوا او غصب عنكم - فانها فى الوقت نفسه تنعى لكم من نفس المقر ببالغ الحزن والأسى نبأ سرقة ايميلهاabeer8@gmail.com , abeeralaskary@gmail.com ) وتخطركم انها لن تستقبل اية ايميلات عليه وهى فى الوقت نفسه غير مسئولة عن اية ايميلات تصلكم منه والمسئولية الكاملة تقع على الحرامى سواء كان فرد ابن (----) او جهة ما والعاقبة عندكم فى المدونات ولا اراكم الله مكروها فى ايميل لديكم
من ناحيتها فان مدونة البلشى تنتهز الفرصة لتهنئة عبير بدخولها الى عالم التدوين وفى الوقت نفسه( تصلح ساعات ) عفوا تعزيها فى ايميلها المفقود.. وايميل يفوت ولا حد يموت.. وشدى حيلك ياعبير والشدة على الله.. وكل الحاجات دى
ولا تنسى ان ترفعى رأسنا فى الأراضى الكندية

Friday, May 4, 2007

الداخلية تحيى الفرح الموازى وتمنع النشطاء

وبرضه مصر لأ

تم الغاء الفرح الموازى بعد ان اصرت الداخلية على المشاركة فيه بكل تقلها .. اشى عربيات امن مركزى وفرق كاراتيه وفرق بلطجية ومدرعات وعربيات ترحيلات لزوم ترحيل المعازيم لسجن طره ..وعربيات مطافى عشان يطفوا نار الفرحة المشعلله جوانا ..فقلنا ما دام جمال مبارك مش عايزينا نشارك فى فرحه نسيب الداخلية تحيى الفرح بمزاجها وعموما الف مبروك الجواز يا جيمى ..بس اذا كنت مقبلتش اننا نشاركك فرحك فاحنا مصرين نوصلك رسالتنا و برضه بنقولك
خديجة آه .. مصرلألألألألألألألألألأ

Thursday, May 3, 2007

خديجة آه .. مصر لأ 2


خديجة آه .. مصر لأ "2 "
متنسوش معادنا بكره الجمعة 4 مايو فى ميدان طلعت حرب هنعمل زى كل الناس مانصحونا ونفصل بين الشخصى والسياسى ونحتفل بفرح جيمى وديجا .. ازاى ما نفرحش وابن رئيسنا بيتجوز .. دا كفاية واحد من ال 13 مليون عانس الموجودين فى مصر انفك عقدتة.. صحيح تكاليف الهلمه اللى همه عمالينها للفرح كانت ممكن تفك عقدة يجى مليون واحد من اللى سابهم ابوه سيادة الرئيس بعد 26 سنة حكم و 79 سنة عمر _ ربنا يديله طولة العمر لغاية ما يبقوا العوانس 20 مليون _ لكن دا ما يمنعش اننا نفرح له ونهيصله ونزيط له ما هو شاب مصرى ومن حقه يتجوز زى كل الشباب
بس وسط ده واحنا بنجامله وشايلين صوانى الشربات من حقنا نقوله ..اننا مش عايزينك تحكمنا وان الجوازة دى لو كانت سكتك لوراثتنا واكمال الشكل الاجتماعى للتوريث زى ما الصحف الأجنبية قالت.. فإحنا بنقولك مبروك يا جيمى الجواز .. بس خديجة آه ومصرلأ .. وكفاية حكم ابوك فينا 26 سنة .. وندرن علينا فى عيد ميلاد السيد الوالد اللى بيواكب كمان مؤتمر العراق فى شرم الشيخ انه لو عملها وحل عن قفانا وسمانا وكل حاجة فيها آ نا لنزرغتلك 75 مليون زغروطة
ورقصنا يا جدع على اجمل اغانى الافراح
اغانى بس مفيش هتافات


وا سيبكو مع بروجرام الحفل زى ما عمله وائل عباس باعتبار انه فى امريكا ومش هيقدر ينقط

الجمعة4 مايوميدان طلعت حرب الساعة سته تعالوا على سنجة عشرة بس مش قوي علشان هدومكم ممكن تتكرمش من كتر الرقص مع الأمن المركزي والبلطجية وكل واحد نقوطه معاه ونقطولي معاكوا والنبي كل واحد ومقدرته اللي ينقط بوزارة واللي ينقط بشركة قطاع عام واللي ينقط بمصنع وحتى اللي عاوز ينقط بقرية سياحية صغننه مافيش مانع وقدم السبت تلاقي الحد والحدق يفهم

بروجرام الحفل مارشات عسكرية وقرآن إستعراض راقص للأمن المركزي إستعراض كاراتيه العاب نارية من الرصاص المطاطي والغازات المسيلة للدموع فقرة للراقصة الوطنية سنية تحرش مشروبات الحفل بيبر سبراي ومية مجاري وزارة الداخلية ترحب بالضيوف لقضاء ليلة على بورش خمس نجوم الانتقالات على حساب معسكر الدراسة للأمن المركزي في سيارات ترحيلات جديدة لانج بفلوس المعونة الأمريكية

 
eXTReMe Tracker